������ý

Dros y degawd diwethaf mae Storiel wedi croesawu degau o ysgolion, grwpiau cymunedol a dros 370,000 o ymwelwyr. O agoriadau gwaith celf i berfformiadau byw a gweithdai creadigol, mae’r lleoliad wedi dod yn ganolbwynt bywiog i gelf a diwylliant yng Ngwynedd. 

Er mwyn nodi a dathlu’r penblwydd arbennig mae diwrnod llawn gweithgareddau wedi ei drefnu ar ddydd Sadwrn, 4 Gorffennaf 2026.

Mae’r gweithgareddau yn cynnwys:

- Teithiau tywys o’r casgliadau
- Gweithdy Ffosil Llechi gyda Hannah Coates-Shea  
- Agoriad swyddogol arddangosfa LLORIOG // GWALLUS a sgwrs gyda’r artist Erin Hughes
- Agoriad swyddogol arddangosfa Toria Cameron a chyflwyniad i’r gwaith gan Helen Rees Leahy 
- Gweithdy 'Zines' gyda Elin Angharad
- Sgiliau pêl droed a gemau gyda Byw’n Iach 
- Gweithgareddau hwyliog gyda Gisda

Fel rhan o’r gwaith paratoi ar gyfer y dathlu mae Storiel yn gwahodd pobl leol i rannu eu hatgofion a’u profiadau o ymweld drwy anfon clip fideo byr (portread) er mwyn eu dangos yn y digwyddiad a’u rhannu dros y misoedd nesaf: storiel@gwynedd.llyw.cymru  
Dywedodd y Cynghorydd Medwyn Hughes, Aelod Cabinet Cyngor Gwynedd dros Economi a Chymuned, “Rydym yn falch iawn o Storiel – mae’n leoliad pwysig i drigolion Bangor a’r sir i gyd sydd yn dathlu hanes a diwylliant Gwynedd.  Mae’n lwyfan pwysig i artistiaid a gwneuthurwyr o Gymru ac i bobl o bob oed gymryd rhan mewn gweithgareddau sy’n meithrin eu creadigrwydd.

“Mae’r bartneriaeth gryf sydd rhwng Cyngor Gwynedd a Phrifysgol Bangor wedi galluogi Storiel i barhau i ddatblygu a darganfod ffyrdd newydd o ddod â phobl ynghyd i fwynhau straeon a chelf ar eu stepan drws.”

Ychwanegodd Gwenan Hine, Ysgrifennydd y Brifysgol, Prifysgol Bangor, “Rydym yn falch ofnadwy o'n partneriaeth sydd wedi bodoli ers dros ddegawd bellach efo Cyngor Gwynedd i ddiogelu casgliadau Storiel a Phrifysgol Bangor. Mae'r cydweithio yn sicrhau gofal casgliadau o'r ansawdd orau yn ogystal â mynediad atynt i'n cymunedau a'n myfyrwyr.”

Mae staff a  Chyfeillion Storiel yn edrych mlaen i groesawu ymwelwyr i Storiel rhwng 10am a  4pm ar 4 Gorffennaf, 2026.

Mae’r holl weithgareddau am ddim, ond mae angen archebu lle ar gyfer y gweithdai o flaen llaw drwy wefan Storiel:  Penblwydd #STORIEL10 - Storiel (Cymru)

Yn ogystal â dathliadau fis Gorffennaf, mae arddangosfeydd a gweithdai di-ri wedi eu trefnu trwy gydol 2026 - ewch i’r gwefan i ddarganfod mwy: